'എക്സ്പെന്ഡബിള്സി'ല്‍ 13 ആക്ഷന്‍ ഹീറോകള്‍!
സില്‍‌വസ്റ്റര്‍ സ്റ്റാലൊണ്‍, അര്‍ണോള്‍ഡ് ഷ്വാസ്‌നെഗര്‍, ബ്രൂസ് വില്ലിസ്, ജെറ്റ്ലി, ജാസണ്‍ സ്റ്റാതം, മിക്കി റൂര്‍ക്കെ.. എല്ലാവരും എണ്ണം‌പറഞ്ഞ ആക്ഷന്‍ ഹീറോകള്‍. ഇവരടക്ക, ഹോളിവുഡിനെ പിടിച്ചുകുലുക്കിയിട്ടുള്ള 13 ആക്ഷന്‍ നായകന്‍‌മാര്‍ ഒരു സിനിമയില്‍ അഭിനയിച്ചാല്‍ എന്ന് ആക്ഷന്‍ സിനിമാപ്രേമികള്‍ പലപ്പോഴും സ്വപ്നം കണ്ടിരിക്കും. ഇതാ അവരുടെ സ്വപ്നം യാഥാര്‍ത്ഥ്യമാകുന്നു. സില്‍‌വസ്റ്റര്‍ സ്റ്റാലൊണ്‍ സംവിധാനം ചെയ്യുന്ന 'ദി എക്സ്പെന്ഡബിള്സ്' എന്ന ആക്ഷന്‍ സിനിമയില്‍ ഹോളിവുഡിലെ ഏതാണ്ട് എല്ലാ ആക്ഷന്‍ നായകന്‍‌മാരും ഒന്നിക്കുകയാണ്. ആഗസ്റ്റ് രണ്ടാമത്തെ ആഴ്ച ഈ സിനിമ പ്രേക്ഷകര്‍ക്ക് മുന്നിലെത്തും.
സ്വേച്ഛാധിപതിയായ ജനറല്‍ ഗാര്‍സയുടെ (ഡേവിഡ് സയാസ്) ദുര്‍‌ഭരണത്താല്‍ ദുരിതം അനുഭവിക്കുകയാണ് വടക്കേ അമേരിക്കയിലെ ഒരു രാജ്യത്തെ ജനങ്ങള്‍. ഗാര്‍സയുടെ ദുഷ്ചെയ്തികള്‍ അതിരുകടന്നപ്പോള്‍ സഹായത്തിനായി 'ദി എക്സ്പെന്ഡബിള്സി'നെ സമീപിക്കുകയാണ് മിസ്റ്റര്‍ ചര്‍ച്ച് (ബ്രൂസ് വില്ലിസ്).
'എക്സ്പെന്ഡബിള്സ്' ഗാംഗിന്റെ നേതാവ് ബാര്‍ണി റോസ് (സില്‍‌വസ്റ്റര്‍ സ്റ്റാലൊണ്‍) ആണ്. കത്തി പ്രയോഗത്തില്‍ വിദഗ്ധനായ ലീ ക്രിസ്മസാണ് (ജോണ്‍ സ്റ്റാതം) സംഘത്തിലെ രണ്ടാമന്‍. ചൈനീസ് ആയോധന കലയില്‍ നിപുണനായ യിന്‍ യാംഗ് (ജെറ്റ്ലി), തോക്ക് ഉപയോഗിക്കുന്നതില്‍ നിപുണനായ ഗണ്ണര്‍ ഗെന്‍‌സന്‍ (ഡോള്‍ഫ് ലുണ്ട്‌ഗ്രെന്‍), ഹെവി വെപ്പണ്‍ വിദഗ്ധനായ ഹെയില്‍ സീസര്‍ (ടെറി ക്ര്യൂസ്) തുടങ്ങിയവരും സഹായത്തിനായി ആയുധക്കടത്തുകാരനായ ടൂളും (മിക്കി റൂര്‍ക്കെ) 'എക്സ്പെന്ഡബിള്സ്' ദൌത്യസംഘത്തില്‍ ഉണ്ട്.
ജനറല്‍ ഗാര്‍സയെ അട്ടിമറിച്ച് ജനങ്ങളെ ദുരിതത്തില്‍ നിന്ന് കരകയറ്റാനുള്ള ദൌത്യം ആരംഭിച്ച 'എക്സ്പെന്ഡബിള്സി'ന് മനസിലാവുകയാണ് സംഗതികള്‍ വിചാരിച്ചത്ര എളുപ്പമല്ലെന്ന്. ദൌത്യം ആരംഭിച്ച് അല്‍‌പദിവസത്തിനുള്ളില്‍ ആരൊക്കെ ആരുടെ ഭാഗത്താണ് എന്ന് മനസിലാവാത്ത അവസ്ഥ സംജാതമാകുന്നു. ജനറല്‍ ഗാര്‍സയുടെ ബുദ്ധിശക്തിക്കും ആള്‍‌ബലത്തിനും മുന്നില്‍ 'ദി എക്സ്പെന്ഡബിള്സ്' പകയ്ക്കുന്നു. ഇതിനിടയില്‍ ബാര്‍ണി റോസിന്റെ പഴയ എതിരാളിയായ ട്രെഞ്ചും (അര്‍ണോള്‍ഡ് ഷ്വാസ്‌നെഗര്‍) രംഗത്തെത്തുന്നതോടെ കഥയുടെ ഗതിമാറുന്നു.
ആഗസ്റ്റ് 13-ന് ലോകമെമ്പാടുമുള്ള തീയേറ്ററുകളില്‍ എത്തുന്ന 'ദി എക്സ്പെന്ഡബിള്സ്' ഒരു ബ്രഹ്മാണ്ഡ സിനിമയാണ്. ജീന്‍ ക്ലോഡെ വാന്‍ഡമി അടക്കമുള്ള മറ്റ് ആക്ഷന്‍ താരങ്ങളെയും ഈ സിനിമയില്‍ അണിനിരത്താന്‍ സ്റ്റാലൊണ്‍ ശ്രമിച്ചിരുന്നു. എന്നാല്‍ വാന്‍ഡമി, വെസ്‌ലി സ്നൈപ്സ്, ഫോറസ്റ്റ് വിറ്റേക്കര്‍, സ്റ്റീവന്‍ സീഗള്‍, സാന്ദ്ര ബുള്ളോക്ക്, കര്‍ട്ട് റസല്‍ എന്നീ പ്രശസ്ത താരങ്ങള്‍ 'ദി എക്സ്പെന്ഡബിള്സി'ല്‍ അഭിനയിക്കാന്‍ വിസമ്മതിച്ചു എന്നാണ് അറിയുന്നത്. പ്രാധാന്യമുള്ള കഥാപാത്രങ്ങളല്ല വാഗ്ദാനം ചെയ്യപ്പെട്ടത് എന്നതിനാലാണ് ഈ താരങ്ങള്‍ വിസമ്മതിച്ചതെത്രെ.
www.keralites.net |
__._,_.___
No comments:
Post a Comment