റഹ്മാനും ഷെനിറ്റിനും അഭിനന്ദനപ്രവാഹം; അധികൃതര്‍ മൗനത്തില്‍
 തിരുവനന്തപുരം: ലെവല്‍ക്രോസില്‍ കുടുങ്ങിയ 28 കുരുന്നുജീവനുകള്‍ രക്ഷിക്കാന്‍ പ്രകടമാക്കിയ മനസ്സാന്നിധ്യത്തിന് ലോക്കോ പൈലറ്റുമാരായ ആലുവ സ്വദേശി പി.എം.എ.റഹ്മാനും എറണാകുളം പുതുവൈപ്പിന്‍ സ്വദേശി കെ.ടി.ഷെനിറ്റിനും അഭിനന്ദനപ്രവാഹം. അപകടം ഒഴിവായതു സംബന്ധിച്ച പത്രവാര്‍ത്ത കണ്ട നാട്ടുകാരും സുഹൃത്തുക്കളുമെല്ലാം ഇരുവരെയും വിളിച്ച് അനുമോദിച്ചു. എന്നാല്‍, യഥാര്‍ത്ഥത്തില്‍ അനുമോദിക്കാന്‍ മുന്നോട്ടുവരേണ്ട അധികൃതര്‍ ഇപ്പോഴും മൗനത്തിലാണ്.
ഹരിപ്പാട് കരുവാറ്റ വഴിയമ്പലത്തില്‍ നിന്ന് കൊപ്പാറക്കടവിലേക്ക് പോകുന്ന ലെവല്‍ക്രോസില്‍ വെള്ളിയാഴ്ച രാവിലെ ഒന്‍പതിനാണ് വന്‍ദുരന്തം ഒഴിവായത്. ബാംഗ്ലൂര്‍ -തിരുവനന്തപുരം പ്രതിവാര തീവണ്ടിയുമായി മുന്നോട്ടു വരികയായിരുന്ന റഹ്മാനും ഷെനിറ്റും ലെവല്‍ക്രോസില്‍ മിനിബസ് കുടുങ്ങിക്കിടക്കുന്നത് കണ്ടു. ഉടന്‍ എമര്‍ജന്‍സി ബ്രേക്കിട്ട് പവര്‍ ക്ലോസ് ചെയ്ത് തീവണ്ടി നിര്‍ത്തിയപ്പോള്‍ വാനില്‍ നിന്നുള്ള ദൂരം 200 മീറ്റര്‍ മാത്രമായിരുന്നു. കരുവാറ്റ അല്‍അമീന്‍ സ്‌കൂളിലെ കുട്ടികളാണ് തലനാരിഴയ്ക്ക് രക്ഷപ്പെട്ടത്.
രാജ്യത്തെവിടെ ദുരന്തമുണ്ടാവുമ്പോഴും മണിക്കൂറുകള്‍ക്കകം പൈലറ്റുമാര്‍ക്കെതിരെ ശിക്ഷാനടപടി സ്വീകരിക്കുന്ന അധികൃതര്‍ റഹ്മാനും ഷെനിറ്റും ചെയ്ത സദ്പ്രവൃത്തി അവഗണിച്ച മട്ടാണ്. ശനിയാഴ്ച റെയില്‍വേ ഓഫീസുകള്‍ അവധിയാണെന്നും അഭിനന്ദനത്തിനുള്ള നടപടി സ്വീകരിക്കേണ്ട ഉദ്യോഗസ്ഥന്‍ സ്ഥലത്തില്ലെന്നുമെല്ലാം വിശദീകരണമുണ്ട്. റഹ്മാനെയും ഷെനിറ്റിനെയും വിളിച്ചവരുടെ കൂട്ടത്തില്‍ സര്‍ക്കാരിന്റെയോ റെയില്‍വേയുടെയോ ഉന്നതതലങ്ങളിലുള്ള ആരും തന്നെയുണ്ടായിരുന്നില്ല എന്നറിയുന്നു.
കേന്ദ്രറെയില്‍വെ മന്ത്രി ഇ. അഹമ്മദിന്റെ സ്വന്തം സംസ്ഥാനത്തുനടന്ന കാര്യമായിട്ടുപോലും അദ്ദേഹത്തിന്റെ ഓഫീസ് അറിഞ്ഞത് പത്രവാര്‍ത്ത കണ്ടിട്ടാണ്. റഹ്മാന്റെയും ഷെനിറ്റിന്റെയും പ്രവൃത്തി ശ്രദ്ധയില്‍പ്പെട്ടിട്ടുണ്ടെന്നും സംസ്ഥാനത്ത് റെയില്‍വേയുടെ ചുമതല വഹിക്കുന്ന മന്ത്രി എം. വിജയകുമാര്‍ വിജയവാഡയില്‍ നിന്ന്തിരിച്ചെത്തിയ ശേഷം ഉചിതമായ നടപടി സ്വീകരിക്കുമെന്നും അദ്ദേഹത്തിന്റെ ഓഫീസ് അറിയിച്ചു.
റഹ്മാനും ഷെനിറ്റും ശനിയാഴ്ച രാവിലെ 5.30ന് തിരുവനന്തപുരം വിട്ടു. ഇന്‍ഡോറിലേക്കുള്ള എക്‌സ്പ്രസ് തീവണ്ടി ഷൊറണൂര്‍വരെയെത്തിക്കാനുള്ള ചുമതലയുമായി. അവര്‍ക്ക് പരിഭവങ്ങളില്ല, വലിയൊരു ദുരന്തത്തില്‍ നിന്ന് തങ്ങളെരക്ഷിച്ച ദൈവത്തോടുള്ള നന്ദി മാത്രം. From: Mathrubhumi Online News (8 Aug. 2010) | 
No comments:
Post a Comment